வெண்பனி சொர்க்கம் ‘மணாலி சுற்றுலா

பனிப்பொழிவில் நனையவும், பனிமலையின் அழகை ரசிக்கவும் விரும்பாதவர் யாரும் இல்லை என்றே சொல்லலாம். தேன் நிலவு பயணிகளுக்கும், நண்பர்களுடன் மகிழ்ச்சியாக நேரம் செலவிட விரும்புவோருக்கும் ஏற்ற இடமாக விளங்குகிறது மணாலி.

அதிக செலவில் வெளிநாடுகளுக்கு சென்று பனி மழையை அனுபவிக்க முடியாதவர்களுக்கு, குறைந்த செலவில் அதே அனுபவத்தை வழங்கும் சிறந்த இடம் இதுவாகும்.

பியாஸ் நதிக்கரையில் அமைந்துள்ள மணாலி, இயற்கையை நேசிப்பவர்களுக்கும் அமைதியை விரும்புவோருக்கும் ஒரு சொர்க்கமாக திகழ்கிறது.

இமயமலையில் அமைந்துள்ள மணாலி, இமாச்சலப் பிரதேசத்தின் குல்லு மாவட்டத்தில், குல்லு நகரத்திற்கு அருகில் உள்ள ஒரு அழகிய மலைநகரம். குளிர்ச்சியான காலநிலை மற்றும் மனதை கவரும் இயற்கைக் காட்சிகள் காரணமாக இந்த இடம் மிகவும் பிரபலமானது.

இது சிம்லாவிலிருந்து வடக்கே சுமார் 270 கிலோமீட்டர் தொலைவிலும், புதுடெல்லியிலிருந்து வடகிழக்கே சுமார் 544 கிலோமீட்டர் தொலைவிலும் அமைந்துள்ளது.

மலைகள், ஆறுகள், அருவிகள், பனியில் விளையாடும் சாகச விளையாட்டுகள், ட்ரெக்கிங், ராஃப்டிங், ஜிப்-லைன் போன்ற பல்வேறு அனுபவங்களை உள்ளடக்கியதால், மணாலி பலரும் விரும்பிச் செல்லும் சுற்றுலா தலமாக திகழ்கிறது.

மணாலிக்கு எப்படி செல்வது?

தமிழ்நாட்டிலிருந்து மணாலிக்கு நேரடி போக்குவரத்து வசதி இல்லை. ஆனால் ரயில் அல்லது விமானம் மூலம் டெல்லி சென்று, அங்கிருந்து மணாலி செல்லலாம்.

தமிழ்நாட்டிலிருந்து டெல்லி செல்லும் ரயில் கட்டணம் பொதுவாக ரூ.1500 முதல் ரூ.3000 வரை இருக்கும். உதாரணமாக, சென்னையிலிருந்து சனிக்கிழமை காலை 6 மணிக்கு கிளம்பும் நிஜாமுத்தீன் எக்ஸ்பிரஸ், அடுத்த நாள் காலை 10 மணிக்கு டெல்லி சென்றடையும்.

விமானம் மூலம் செல்ல விரும்பினால், தமிழ்நாட்டிலிருந்து டெல்லிக்கு ரூ.5000 முதல் ரூ.10000 வரை கட்டணம் இருக்கும்.

டெல்லியிலிருந்து மணாலி செல்ல பல்வேறு வழிகள் உள்ளன. அதில் மிகவும் பிரபலமானது Volvo பேருந்து பயணம். டெல்லியில் உள்ள காஷ்மீர்கேட் பகுதியில் இருந்து மாலை 5 மணியளவில் புறப்பட்டால், சுமார் 12 மணி நேர பயணத்திற்கு பிறகு மணாலி சென்றடையலாம்.

விமானப் பயணத்தை தேர்வு செய்தால், டெல்லியிலிருந்து சண்டிகர் வரை விமானத்தில் சென்று, அங்கிருந்து சுமார் 10 மணி நேரம் கார் மூலம் மணாலி செல்லலாம்.

சண்டிகர் முதல் மணாலி வரை உள்ள இந்த பாதை மிகவும் அழகானது — இரண்டு மலைகளுக்கு நடுவே ஓடும் ஆறு, மலை ஓரமாகச் செல்லும் சாலை, சில இடங்களில் மேடு பள்ளமாக இருக்கும் பாதைகள்… இந்த பயணம் முழுக்க ஒரு திரில்லான அனுபவமாக இருக்கும்.

தங்கும் விடுதிகள்:

மணாலியில் சுற்றிப் பார்க்க வேண்டிய முக்கிய இடங்கள் — மணிகரன், கசோல், ஜானா வாட்டர்பால்ஸ், நகர்காஸ்டல், மணாலி மால் ரோடு, ஸ்னோ கேம்ஸ் போன்றவை. இவ்விடங்களை நிதானமாக அனுபவிக்க குறைந்தது 3 முதல் 4 நாட்கள் தேவைப்படும்.

இங்குள்ள தங்கும் விடுதிகள் ரூ.1000 முதல் ஆரம்பித்து, ஒவ்வொருவரின் வசதிக்கும் பட்ஜெட்டுக்கும் ஏற்ப பல்வேறு விருப்பங்களில் கிடைக்கின்றன.

உணவு:

மணாலியில் சேமியா, பூரி, ரொட்டி, ஆம்லெட், பழங்கள், ஜூஸ், தால், சாதம் போன்ற பல்வேறு உணவுகளை சுவைத்து பார்க்கலாம். உள்ளூர் சுவைகளும், எளிய உணவுகளும் இங்கு பயண அனுபவத்தை மேலும் நிறைவாக்குகின்றன.

வெண்பனிசொர்க்கம்‘மணாலிசுற்றுலா’

மணிகரன் — “பார்வதி பள்ளத்தாக்கு

பனிப்பொழிவையும் பனிமலையின் அழகையும் ரசிக்கக் கூடிய இந்த பகுதியில், இயற்கையாக எப்போதும் சூடான நீர் பொங்கி வருவது ஒரு அதிசயமான அனுபவமாகும்.

மணாலியிலிருந்து சுமார் 80 கிலோமீட்டர் தொலைவிலும், குல்லு நகரிலிருந்து 44 கிலோமீட்டர் தொலைவிலும் அமைந்துள்ள இந்த மணிகரன், “பார்வதி பள்ளத்தாக்கு” என அழைக்கப்படுகிறது. மத முக்கியத்துவம் கொண்ட இந்த இடம், இந்து மற்றும் சீக்கியர்களின் முக்கிய யாத்திரைத் தலமாக விளங்குகிறது.

பியாஸ் நதி மற்றும் பார்வதி நதி சங்கமிக்கும் பகுதியில் அமைந்துள்ள இந்த தலத்தில், சிவபெருமான் ஆக்ரோஷமான தோற்றத்தில் காட்சியளிப்பதை காணலாம்.

அந்த சிலைக்குக் கீழே இயற்கையாகவே கொதிக்கும் சூடான நீர் வெளிப்படுவது, இவ்விடத்தின் தனித்துவமான சிறப்பாகும்.

இந்த சூடான நீரில் தான் அரிசி வைத்து வேகவைத்து பிரசாதமாக வழங்குகின்றனர். சிலர் தவலை பயன்படுத்தி அரிசி வேக வைப்பதுடன், சிலர் சிறிய துணிப் பையில் அரிசியை கட்டி, அதை சூடான நீரில் தொங்கவிட்டு வேக வைத்து பிரசாதமாக சமர்ப்பிக்கின்றனர்.

மேலும், நீச்சல் குளம் போன்ற அமைப்பில் இருக்கும் தொட்டியில் குளித்து விட்டு கோவிலுக்குள் செல்லும் அனுபவமும் இங்கு தனித்துவமானது.

கோவிலுக்குள் சென்றால், ஆக்ரோஷமான சிவபெருமான் சிலை, இயற்கையான சூடான நீர், குகை கோவில், பிரசாதம், நந்தி சிலை என பல அம்சங்களை ஒரே இடத்தில் காண முடியும்.

பார்வதி தேவியின் நகை தொலைந்ததால் சிவபெருமான் கோபத்தில் இருந்ததாக இந்த கோவிலுடன் தொடர்புடைய பல புராணக் கதைகள் கூறப்படுகின்றன.

கசோல் (Kasol):

“இந்தியாவின் குட்டி இஸ்ரேல்” என அழைக்கப்படும் கசோல், பார்வதி பள்ளத்தாக்கில் அமைந்துள்ள ஒரு அழகிய மலைக்கிராமம். இங்கு அதிக அளவில் இஸ்ரேல் சுற்றுலா பயணிகளை காண முடிவதால், இந்த பெயர் பெற்றுள்ளது.

இயற்கை அழகும், அமைதியான சூழலும், சாகச அனுபவங்களும் இணைந்த இந்த இடம், பயணிகளை கவரும் ஒரு சிறப்பு தன்மை கொண்டது.

மலையேற்றம் (Trekking), சாகச நடவடிக்கைகள் போன்றவற்றுக்கு இது மிகவும் பிரபலமான இடமாகும். மலாணா மற்றும் கங்கர் போன்ற இடங்களுக்கு ட்ரெக்கிங் பயணம் இங்கிருந்தே ஆரம்பமாகிறது.

கசோலில் உள்ள மார்க்கெட்களில் அணிகலன்கள், மணி பர்ஸ்கள், விதவிதமான பைகள் போன்றவை விற்பனை செய்யப்படுகின்றன. நினைவுப் பொருட்களாக வாங்கிக் கொண்டு வர விரும்புவோருக்கு இது ஒரு நல்ல வாய்ப்பு.

மேலும், கசோலில் உள்ள Nature Park, சுமார் அரை மணி நேரம் அமைதியாக செலவிட ஏற்ற இடமாகும். இந்த பூங்காவிற்கு நுழைவு கட்டணமாக ரூ.30 வசூலிக்கப்படுகிறது.

நாகர் கோட்டை (Naggar Castle):

மணாலியிலிருந்து சுமார் 23 கிலோமீட்டர் தொலைவில் அமைந்துள்ள நாகர் கோட்டை, இன்றைக்கு பாரம்பரிய ஹோட்டலாக செயல்பட்டு வருகிறது. இதன் உள்ளே செல்ல நுழைவு கட்டணம் வசூலிக்கப்படுகிறது.

சிமெண்டு பயன்படுத்தாமல், கல் மற்றும் மரக்கட்டைகளைக் கொண்டு நேர்த்தியாகவும் அழகாகவும் கட்டப்பட்ட இந்த இரு அடுக்குக் கட்டிடம், பாரம்பரிய கட்டிடக் கலையின் சிறப்பை வெளிப்படுத்துகிறது. குறிப்பாக, அதன் மேற்பரப்பு முழுவதும் மரத்தால் செய்யப்பட்டிருப்பது கண்கவர் அம்சமாகும்.

இந்த நாகர் கோட்டை கி.பி. 1460 ஆம் ஆண்டு குல்லு அரசர் ராஜா சித் சிங் அவர்களால் கட்டப்பட்டது. பல நூற்றாண்டுகளாக இது குல்லு மன்னர்களின் அரச இல்லமாகவும், நிர்வாகத் தலைமையகமாகவும் செயல்பட்டுள்ளது.

ஐரோப்பிய கட்டிடக்கலையின் தாக்கத்தையும் வெளிப்படுத்தும் இந்த கட்டிடம், தற்போது இமாச்சலப் பிரதேச சுற்றுலா கழகத்தால் பராமரிக்கப்படும் பாரம்பரிய ஹோட்டலாக உள்ளது.

தரைத்தளம் மற்றும் முதல் அடுக்கு என இரண்டு நிலைகளைக் கொண்ட இந்த இடத்தில் ஒரு அருங்காட்சியகமும் அமைந்துள்ளது.

அந்த அருங்காட்சியகத்தில், மணாலி மக்களின் பழைய வாழ்க்கை முறை, அவர்கள் பயன்படுத்திய பொருட்கள், செய்த வேலைகள் போன்றவற்றை நேரில் காண முடிகிறது.

இந்த ஹோட்டலில் இருந்து பார்க்கும் காட்சி மேலும் சிறப்பு — பியாஸ் பள்ளத்தாக்கின் பரந்த அழகும், பனியால் மூடிய மலைச்சிகரங்களின் மெய்மறக்கச் செய்யும் காட்சியும், பயணிகளை மயக்காமல் இருக்காது.

ஜனா நீர்வீழ்ச்சி (Jana Waterfalls):

ஜனா நகரில் அமைந்துள்ள இந்த அமைதியான மற்றும் அழகான நீர்வீழ்ச்சி, இயற்கையின் மடியில் அமைந்த ஒரு மறைந்த சொர்க்கம் போல உணர்வை தருகிறது.

மணாலியிலிருந்து சுமார் 32 கிலோமீட்டர் தொலைவிலும், நாகர் கோட்டையிலிருந்து 12 கிலோமீட்டர் தொலைவிலும் இது அமைந்துள்ளது.

மலையின் சரிவுகளில் இருந்து இரண்டு, மூன்று இடங்களில் ஊற்றிக்கொண்டு வரும் நீர்தாரைகள், இந்த நீர்வீழ்ச்சியின் தனித்துவமான அழகை வெளிப்படுத்துகின்றன.

சுற்றிலும் அடர்ந்த பைன் மற்றும் தேவதாரு மரங்களும், ஆப்பிள் தோட்டங்களும் சூழ்ந்துள்ளதால், இங்கு நிலவும் சூழல் மிகவும் குளிர்ச்சியாகவும் மனதை கவரும் வகையிலும் இருக்கும்.

இந்த நீர்வீழ்ச்சியை அடைய, சிறிய அளவில் ட்ரெக்கிங் செய்து செல்ல வேண்டியிருக்கும். அதுவே இந்த பயணத்தை மேலும் சுவாரஸ்யமாக மாற்றுகிறது. இங்கு சுமார் ஒரு மணி நேரம் அமைதியாக செலவிட்டு இயற்கையை ரசிக்கலாம்.

நீர்வீழ்ச்சிக்கு அருகில் உள்ள சிறிய உணவகங்களில் “சித்து” (Siddu) எனப்படும் வேகவைத்த ரொட்டி மற்றும் ஹிமாச்சல் தாலி போன்ற உள்ளூர் உணவுகளை சுவைத்து பார்க்கலாம்.

மே முதல் அக்டோபர் வரை இந்த இடத்தை பார்வையிட மிகவும் ஏற்ற காலமாக கருதப்படுகிறது.

சோலாங் பள்ளத்தாக்கு (Solang Valley):

மணாலியில் சாகசத்தை விரும்புபவர்களுக்கு சொர்க்கமாகக் கருதப்படும் சோலாங் பள்ளத்தாக்கு, இமயமலையில் சுமார் 2560 மீட்டர் உயரத்தில் அமைந்துள்ளது.

லே–மணாலி நெடுஞ்சாலையில், ரோத்தாங் பாஸுக்கு செல்லும் வழியிலேயே இந்த அழகிய பள்ளத்தாக்கு அமைந்துள்ளது.

பனியால் மூடிய மலைகளின் அற்புதமான காட்சிகள், இங்கு வரும் ஒவ்வொருவரையும் மெய்சிலிர்க்க வைக்கும்.

சோலாங் பள்ளத்தாக்கின் அடிவாரத்தில் பரந்த நிலப்பரப்பில் சில விளையாட்டுகளையும், மலை உச்சிகளில் சாகச செயல்பாடுகளையும் அனுபவிக்கலாம்.

இங்கு மலையேற்றம், பாராசூட் (Paragliding), பனிச்சறுக்கு (Skiing), ஜிப்-லைன், யாக் ரைடு போன்ற பல சாகச விளையாட்டுகள் கிடைக்கின்றன. தேவையான கட்டணத்தை செலுத்தி இவ்வனைத்தையும் அனுபவிக்கலாம்.

விளையாட்டுகளில் ஈடுபடுவதற்கு முன், அங்குள்ள கடைகளில் இருந்து ஷூ, ஸ்வெட்டர் போன்ற குளிர் பாதுகாப்பு உடைகளை வாடகைக்கு எடுக்க வேண்டும்.

இந்த உடைகள் இல்லாமல் பல செயல்பாடுகளில் பங்கேற்க அனுமதி கிடையாது.

பனிப்பொழிவை ரசிக்க விரும்புவோர் டிசம்பர் மற்றும் ஜனவரி மாதங்களில் வருவது சிறந்தது. மார்ச் மற்றும் ஏப்ரல் மாதங்களில் பனி குறைவாக இருப்பதால், சுற்றிப்பார்க்கவும் இயற்கையை நிதானமாக அனுபவிக்கவும் ஏற்ற காலமாக இருக்கும்.

மேலும், இங்கு பல சிறிய கடைகள் உள்ளதால், குளிரான சூழலில் ஒரு கப் சூடான டீயை சுவைப்பது தனி மகிழ்ச்சியை அளிக்கும்.

மணாலி மால் ரோடு (Manali Mall Road):

மணாலியின் மையப்பகுதியில் அமைந்துள்ள மால் ரோடு, சுற்றுலா பயணிகள் அதிகம் விரும்பும் ஒரு பரபரப்பான இடமாகும். எப்போதும் மக்கள் நெரிசலுடன் காணப்படும் இந்த பகுதி, கடைகள், உணவகங்கள் மற்றும் உள்ளூர் பொருட்களால் நிரம்பியுள்ளது.

இங்கு உள்ள உள்ளூர் உணவகங்களில் மற்றும் சாலையோர கடைகளில் பல்வேறு வகையான உணவுகளை சுவைத்து பார்க்கலாம். அந்த இடத்தின் தனித்துவமான சுவைகள், பயண அனுபவத்தை மேலும் இனிமையாக்குகின்றன.

மால் ரோட்டில் உள்ள கடைகளில் தொப்பிகள், சால்வைகள், கம்பளி உடைகள் மற்றும் நினைவுப் பொருட்கள் போன்றவற்றை வாங்கிக் கொள்ளலாம். பயண நினைவுகளாக எடுத்துச் செல்ல இது ஒரு நல்ல வாய்ப்பு.

இந்த இடத்தில் சுமார் 2 முதல் 3 மணி நேரம் செலவிடுவது சிறந்ததாக இருக்கும். மேலும், மால் ரோட்டிலிருந்து நடந்து செல்லக்கூடிய தூரத்தில் ஒரு பூங்காவும் அமைந்துள்ளது; அதையும் நேரம் கிடைத்தால் சுற்றிப் பார்க்கலாம்.

ரோத்தாங் கணவாய் (Rohtang Pass):

மணாலியிலிருந்து சுமார் 51 கிலோமீட்டர் தொலைவில் அமைந்துள்ள ரோத்தாங் கணவாய், உயரமான மலைப்பாதைகளில் ஒன்றாகும்.

லே–மணாலி நெடுஞ்சாலையை இணைக்கும் இந்த பகுதி, பனியால் சூழப்பட்ட அதிசயமான இயற்கைக் காட்சிகளால் சுற்றுலாப் பயணிகளை கவர்கிறது.

இமயமலையில் அமைந்துள்ள இந்த பகுதியில், மலையை குடைந்து உருவாக்கப்பட்ட அட்டல் சுரங்கப்பாதை (Atal Tunnel) முக்கிய சிறப்பாகும்.

முன்னாள் இந்திய பிரதமர் அடல் பிகாரி வாஜ்பாய் அவர்களின் நினைவாக இதற்கு “Atal Tunnel” என பெயரிடப்பட்டுள்ளது.

சுமார் 10,000 அடி உயரத்தில், 9 கிலோமீட்டர் நீளமும், 10 மீட்டர் அகலமும் கொண்ட இந்த சுரங்கப்பாதை, நவீன தொழில்நுட்பத்தின் அற்புதமாக திகழ்கிறது.

முழுவதும் மின்விளக்குகள் மற்றும் கண்காணிப்பு கேமராக்களுடன் ஒளிரும் இந்த சுரங்கம், ஒரு தனித்துவமான பயண அனுபவத்தை வழங்குகிறது.

உயர்ந்த பனிமலைகள், பள்ளத்தாக்குகள் மற்றும் குறைந்த வெப்பநிலை ஆகியவை மணாலியை ஒரு சிறந்த சுற்றுலா தலமாக மாற்றுகின்றன.

தமிழ்நாட்டிலிருந்து பயணம் தொடங்குபவர்கள் டெல்லி வரை ரயில் அல்லது விமானம் மூலம் சென்று, அங்கிருந்து சொகுசு பேருந்து, கார் அல்லது விமானம் மூலம் மணாலி செல்லலாம்.

மணாலி பயணத்தில், பரபரப்பான மால் ரோட்டில் சாலையோர உணவுகளை சுவைத்து, ஆக்ரோஷமான மணிகரன் சிவன் கோவிலில் வழிபட்டு, “குட்டி இஸ்ரேல்” என அழைக்கப்படும்

கசோலில் இயற்கையை ரசித்து, ஜனா நீர்வீழ்ச்சியின் அழகை கண்டு, சோலாங் பள்ளத்தாக்கில் சாகச விளையாட்டுகளை அனுபவித்து, மீண்டும் டெல்லி வழியாக தமிழ்நாட்டிற்கு திரும்பலாம்.

ஹிடிம்பா தேவி கோவில் (Hadimba Temple):

பழமையான மரக்கட்டிடக் கலையில் கட்டப்பட்ட இந்த கோவில், அடர்ந்த தேவதாரு காடுகளின் நடுவில் அமைந்துள்ளது. அமைதியான சூழல் மற்றும் தனித்துவமான கட்டிடம் காரணமாக மிகவும் பிரபலமான இடம்.

வசிஷ்ட் கிராமம் (Vashisht Village & Hot Springs):
இங்கு இயற்கையான சூடான நீரூற்றுகள் உள்ளன. குளித்து புத்துணர்ச்சி பெறும் அனுபவம் மிகவும் தனித்துவமானது. அருகில் பழமையான கோவில்களும் உள்ளன.

அட்டல் டன்னல் (Atal Tunnel – Sissu side):
சுரங்கப்பாதையை கடந்தவுடன் சிசு (Sissu) என்ற அழகான கிராமம் கிடைக்கும். அங்கு நீர்வீழ்ச்சி, ஏரி, பனிமலை காட்சிகள்—all in one spot.

ஹம்டா பாஸ் (Hampta Pass):
ட்ரெக்கிங் விரும்பிகளுக்கு சொர்க்கம். மலைகள், பள்ளத்தாக்குகள், பனிப் பாதைகள்—all mixed adventure experience.

பியாஸ் நதி (Beas River):
ராஃப்டிங் செய்ய மிகவும் பிரபலமான இடம். நதிக்கரையில் அமைதியாக உட்கார்ந்து ரசிக்கவும் சூப்பர்.

Old Manali:
சிறிய கஃபேக்கள், இசை, chill vibe… இளைஞர்களுக்கு மிகவும் பிடிக்கும் இடம். இங்கு foreign culture feel கூட இருக்கும்.

வன விஹார் (Van Vihar):
மணாலி நகரத்திலேயே இருக்கும் ஒரு அழகான பூங்கா. பைன் மரங்கள், சிறிய ஏரி, படகு சவாரி—all simple & relaxing.

ஜோகினி நீர்வீழ்ச்சி (Jogini Waterfalls):
சிறிய ட்ரெக்கிங் செய்து செல்ல வேண்டிய நீர்வீழ்ச்சி. வழியிலேயே super scenic views கிடைக்கும்.

சேத் ஹவுஸ் & திபெத்திய மடங்கள் (Tibetan Monasteries):

அமைதியான சூழல், வண்ணமயமான கட்டிடங்கள்—spiritual feel தரும் இடங்கள்.

ஆச்சரியத்தையும் துணிச்சலையும் ஒரே நேரத்தில் அனுபவிக்கச் செய்யும் இடம் மணாலி. இயற்கையாக பொங்கும் சூடான நீர் ஒரு அதிசயமாக இருந்தால், பனியில் நடைபெறும் சாகச விளையாட்டுகள் துணிச்சலின் சிகரமாக இருக்கும்.

பனிமழையில் நனைந்து, பனிச்சிகரங்களை நேரில் கண்டு ரசிப்பது — மறக்க முடியாத ஒரு வித்தியாசமான அனுபவம்.</p>