ஈஷா யோகா மையம்-ஆதியோகி சிவன்

வெள்ளியங்கிரி மலையடிவாரத்தில் அமைந்துள்ள உலகப் புகழ்பெற்ற ஆன்மிக மையமான ஈஷா யோகா மையத்திற்குத்தான் இன்று நாம் பயணம் செய்யப் போகிறோம்.

இயற்கை எழில் சூழ்ந்த மலைகளின் பின்னணியில் கம்பீரமாக எழுந்து நிற்கும் 112 அடி உயர ஆதியோ கி சிவன் சிலை, இந்த இடத்தின் முக்கிய அடையாளமாக விளங்குகிறது.

உலகம் முழுவதும் இருந்து ஆயிரக்கணக்கானோர் வருகை தரும் இந்த ஆன்மிகத் தலம், யோகா, தியானம் மற்றும் உள்நிலை அமைதியை தேடும் பயணிகளின் முக்கிய ஈர்ப்பிடமாக உள்ளது.

வெள்ளியங்கிரி மலைகளின் அடிவாரத்தில் அமைந்துள்ள இந்த வளாகம், ஆன்மிக அனுபவத்தையும் இயற்கை அழகையும் ஒருசேர வழங்கும் தனித்துவமான இடமாக திகழ்கிறது.

ஆதியோகியின் பிரம்மாண்ட திருவுருவத்தை தரிசித்தபடி, ஈஷா யோகா மையத்தின் சிறப்புகளை இன்று நாம் சுற்றிப் பார்க்கப் போகிறோம்.

வழித்தடம் மற்றும் சுற்றுலா இடம்

தமிழ்நாட்டின் எந்த பகுதியிலிருந்து வந்தாலும், கோயம்பத்தூரை எளிதாக சென்றடைய முடியும்.

கோயம்பத்தூரை மையமாகக் கொண்டு கேரளா, ஊட்டி, பொள்ளாச்சி, வால்பாறை, மூணாறு, மருதமலை மற்றும் வெள்ளியங்கிரி போன்ற பல முக்கிய சுற்றுலா மற்றும் ஆன்மிக தலங்களுக்கும் பயணம் செய்யலாம்.

அப்படிப்பட்ட கோயம்பத்தூரிலிருந்து சுமார் 30 கிலோமீட்டர் தொலைவில், வெள்ளியங்கிரி மலையடிவாரத்தில் அமைந்துள்ள ஈஷா யோகா மையத்திற்குத்தான் நாங்கள் பயணம் மேற்கொண்டோம்.

கோயம்பத்தூரிலிருந்து இந்த இடத்திற்கு நேரடி அரசு பேருந்து வசதிகளும் உள்ளன.

அதனால் சொந்த வாகனம் இல்லாதவர்களும் எளிதாக ஈஷா யோகா மையத்தை சென்றடைய முடியும்.

மேலும், வெள்ளியங்கிரி மலை ஏறும் சீசன் காலங்களில் வருபவர்களும் இதே பாதையை பயன்படுத்தியே பயணம் செய்வார்கள்.

பேருந்து நேரங்களை முன்கூட்டியே தெரிந்து கொண்டு பயணம் செய்தால், ஈஷா யோகா மையத்தையும் வெள்ளியங்கிரி மலையையும் சிரமமின்றி அடைய முடியும்.

மலையடிவாரத்தில் கம்பீரமாக நிற்கும் ஆதியோகி

ஈஷா யோகா மையத்தை நெருங்க நெருங்க, சுற்றிலும் பரந்து விரிந்த வயல்வெளிகளும் பின்னணியில் காட்சியளிக்கும் வெள்ளியங்கிரி மலைத்தொடர்களும் கண்களை கவரத் தொடங்கின.

அந்த இயற்கை சூழலின் நடுவே, பிரம்மாண்டமான ஆதியோகி சிவன் சிலை தொலைவிலிருந்தே தென்பட ஆரம்பித்தது.

மலையின் பின்னணியில் கம்பீரமாக எழுந்து நிற்கும் அந்த சிலையை முதல் முறையாக பார்க்கும் போது ஏற்படும் பிரமிப்பு வார்த்தைகளால் விவரிக்க முடியாததாக இருந்தது.

இயற்கையும் ஆன்மிகமும் ஒன்றாக கலந்துள்ள இந்த காட்சி, அங்கு செல்லும் ஒவ்வொருவரின் மனதிலும் தனி இடம் பிடிக்கும்.

லாக்கர் வசதி

ஈஷா யோகா மையத்தை அடைந்த பிறகு, முதலில் அங்குள்ள நுழைவு பகுதிக்கு சென்றோம்.

நுழைவாயிலுக்கு எதிர்புறத்தில் பயணிகளுக்காக லாக்கர் வசதி ஏற்பாடு செய்யப்பட்டிருந்தது.

மொபைல் போன், பைகள் மற்றும் பிற தனிப்பட்ட பொருட்களை பாதுகாப்பாக அந்த லாக்கரில் வைத்துவிட்டு, வளாகத்திற்குள் செல்லலாம்.

அனைத்து ஏற்பாடுகளையும் முடித்த பிறகு, ஈஷா யோகா மையத்தின் ஆன்மிக சூழலை அனுபவிக்கும் நோக்கில் நாங்கள் உள்ளே செல்லத் தொடங்கினோம்.

நுழைவாயில் மற்றும் வரவேற்பு அனுபவம்

ஈஷா யோகா மையத்தின் நுழைவாயிலை நெருங்கியவுடன், மிகப் பிரம்மாண்டமான பாம்பு சிலை ஒன்று வருகையாளர்களை வரவேற்கும் வகையில் அமைந்திருந்தது.

அந்த நுழைவாயிலின் வடிவமைப்பே இந்த இடத்தின் ஆன்மிக மற்றும் கலைநயத்தை வெளிப்படுத்தும் வகையில் இருந்தது.

முதன்முறையாக வருபவர்களுக்கு அந்த காட்சி ஒரு தனித்துவமான அனுபவத்தை ஏற்படுத்துகிறது.

நுழைவாயிலை கடந்து உள்ளே சென்றதும், காலணிகளை பாதுகாப்பாக ஒப்படைப்பதற்கான வசதி ஏற்பாடு செய்யப்பட்டிருந்தது.

அங்கு வழங்கப்படும் சிறப்பு பையில் காலணிகளை வைத்து ஒப்படைத்துவிட்டு, வளாகத்திற்குள் செல்லலாம்.

அனைத்து ஏற்பாடுகளும் மிகவும் ஒழுங்காக நிர்வகிக்கப்பட்டு வந்தன.

அனுமதி அடையாளம் மற்றும் வளாக வசதிகள்

வளாகத்திற்குள் நுழைவதற்கு முன்பு பதிவு செய்யப்பட்ட பிறகு, கையில் ஒரு அடையாள டேக் கட்டி வழங்கப்படுகிறது.

இந்த அடையாள டேக் இருந்தால்தான் வளாகத்தின் சில குறிப்பிட்ட பகுதிகளுக்குள் செல்ல அனுமதி வழங்கப்படுகிறது.

அதனால் வருகையாளர்கள் அனைவரும் அதை பாதுகாப்பாக வைத்திருக்க வேண்டும்.

ஈஷா யோகா மைய வளாகத்திற்குள்ளேயே தங்கும் வசதிகளும் ஏற்பாடு செய்யப்பட்டுள்ளன.

பல வகையான காட்டேஜ்கள் மற்றும் தங்கும் இடங்கள் இங்கு உள்ளன.

ஆன்மிக நிகழ்ச்சிகள், தியான பயிற்சிகள் அல்லது அமைதியான சூழலில் சில நாட்கள் தங்க விரும்புபவர்கள் இந்த வசதிகளை பயன்படுத்திக் கொள்ளலாம்.

தங்கும் இடங்களை முன்கூட்டியே இணையதளம் மூலம் பதிவு செய்து கொள்ள வேண்டும்.

ஆன்மிக அனுபவம் நோக்கிய முதல் அடிகள்

வளாகத்திற்குள் நுழைந்த பிறகு, சுற்றியிருந்த அமைதியான சூழலும் இயற்கை நிறைந்த தோற்றமும் மனதை கவர்ந்தது.

வெள்ளியங்கிரி மலைகளின் அடிவாரத்தில் அமைந்துள்ள இந்த இடம், நகர வாழ்க்கையின் பரபரப்பிலிருந்து முற்றிலும் மாறுபட்ட ஒரு அனுபவத்தை வழங்குகிறது.

அந்த ஆன்மிக சூழலை உணர்ந்தபடியே, ஈஷா யோகா மையத்தின் முக்கிய பகுதிகளை நோக்கி எங்கள் பயணத்தை தொடர்ந்தோம்.

உணவுக்கூட அனுபவம்

ஈஷா யோகா மையத்திற்குள் நுழைந்த பிறகு, நேராக உணவு பரிமாறப்படும் மண்டபத்திற்குச் சென்றோம்.

உணவுக்கூடத்திற்குள் செல்லும் முன்பு, அனைவரும் தங்களுடைய காலணிகளை குறிப்பிட்ட இடத்தில் கழற்றி வைத்துவிட்டு உள்ளே செல்ல வேண்டும்.

அனைவரும் ஒழுங்காக வரிசையாக அமர்ந்து உணவருந்தும் வகையில் இந்த இடம் வடிவமைக்கப்பட்டுள்ளது.

இங்கு ஒரு நாளில் இரண்டு வேளைகளில் உணவு பரிமாறப்படுகிறது.

பெரும்பாலானோர் தரையில் அமர்ந்துதான் உணவருந்துகிறார்கள்.

அனைவரும் சமம் என்ற எண்ணத்தை அடிப்படையாகக் கொண்டு, எந்த வித வேறுபாடும் இல்லாமல் அனைவரும் ஒன்றாக அமர்ந்து உணவருந்தும் நடைமுறை இங்கு பின்பற்றப்படுகிறது.

தரையில் அமர முடியாதவர்களுக்காக மேசை மற்றும் நாற்காலி வசதிகளும் ஏற்பாடு செய்யப்பட்டுள்ளன.

ஆரோக்கியத்தை மையமாகக் கொண்ட உணவுமுறை

அன்றைய தினம் பரிமாறப்பட்ட உணவு வகைகள் அனைத்தும் ஆரோக்கியத்தை மையமாகக் கொண்டவையாக இருந்தன.

மில்லெட் வகை உணவுகள், காய்கறி சாதம், தயிர் சாதம், கூட்டு, பொரியல், பயிறு வகைகள், கடலை, பழங்கள் மற்றும் காய்கறி குருமா உள்ளிட்ட பல்வேறு உணவுகள் பரிமாறப்பட்டன.

உணவின் சுவையை விட அதன் சத்துணவு மதிப்பிற்கே அதிக முக்கியத்துவம் அளிக்கப்படுவதை உணர முடிந்தது.

ஆரோக்கியமான உணவுப் பழக்கத்தை ஊக்குவிப்பதே இங்குள்ள உணவுமுறையின் முக்கிய நோக்கமாக உள்ளது.

அனைவருக்கும் உணவு பரிமாறப்படும் வரை பொறுமையாக காத்திருந்து, பின்னர் உணவருந்தத் தொடங்க வேண்டும்.

அமைதியும் ஒழுங்கும் நிறைந்த சூழல்

உணவு பரிமாறி முடிந்த பிறகு, உணவை வழங்கிய அனைவருக்கும் நன்றியை வெளிப்படுத்தும் வகையில் ஒரு சிறிய பிரார்த்தனை செய்யப்படுகிறது.

அதன்பிறகு அமைதியாக அமர்ந்து உணவருந்தத் தொடங்கலாம்.

இங்கு இந்தியர்கள் மட்டுமல்லாமல், உலகின் பல்வேறு நாடுகளில் இருந்து வந்த வெளிநாட்டு பயணிகளையும் பார்க்க முடியும்.

அவர்கள் அனைவரும் ஒரே இடத்தில், அமைதியான சூழலில், தேவையற்ற உரையாடல்கள் இல்லாமல் உணவருந்துவதை காண முடிகிறது.

உணவு முடிந்த பிறகு, மீதமுள்ள கழிவுகளை குறிப்பிட்ட கழிவு தொட்டிகளில் போட வேண்டும்.

பின்னர் பயன்படுத்திய தட்டுகளை சுத்தமாக கழுவி, அதற்கென ஒதுக்கப்பட்ட இடத்தில் வைத்து வெளியே வர வேண்டும்.

ஒழுக்கம், சுத்தம் மற்றும் பொறுப்புணர்வு ஆகியவற்றை இயல்பாக கற்றுத்தரும் அனுபவமாக இந்த உணவுக்கூடம் அமைந்துள்ளது.

விளையாட்டு மைதானம் மற்றும் இயற்கை சார்ந்த வாழ்க்கை முறை

உணவுக்கூடத்தை பார்த்த பிறகு, அடுத்ததாக வளாகத்திற்குள் இருந்த ஒரு பெரிய திறந்தவெளி மைதானப் பகுதிக்கு சென்றோம்.

இந்த மைதானம் யோகா மற்றும் தியானம் மட்டுமல்லாமல், உடல் ஆரோக்கியத்திற்கும் முக்கியத்துவம் அளிக்கப்படுவதை உணர்த்தும் இடமாக இருந்தது.

மாலை நேரங்களில் இங்கு தங்கியிருப்பவர்கள் பலரும் ஒன்று சேர்ந்து பல்வேறு விளையாட்டுகளில் ஈடுபடுவார்கள் என்று கூறினார்கள்.

அமைதியான ஆன்மிக சூழலுடன் சேர்ந்து உடற்பயிற்சி மற்றும் விளையாட்டிற்கும் முக்கியத்துவம் வழங்கப்படுவது இந்த இடத்தின் தனிச்சிறப்பாக இருந்தது.

நாட்டுமாட்டு பண்ணை

அதன்பிறகு அங்கிருந்த நாட்டுமாட்டு பண்ணையையும் பார்வையிட்டோம்.

இந்த பகுதியில் பல நாட்டுமாடுகள் பராமரிக்கப்பட்டு வளர்க்கப்பட்டு வந்தன.

அவற்றிடமிருந்து கிடைக்கும் பால் மற்றும் பால் சார்ந்த பொருட்கள், வளாகத்தில் தங்கியிருப்பவர்களுக்கும் அங்கு வரும் பயணிகளுக்கும் பயன்படுத்தப்படுகின்றன என்று விளக்கமளித்தனர்.

இது தவிர, வளாகத்திற்கு வெளியே இன்னும் பெரிய அளவில் நாட்டுமாட்டு பண்ணையும் செயல்பட்டு வருவதாக தெரிவித்தனர்.

இயற்கை சார்ந்த வாழ்க்கை முறையையும் பாரம்பரிய வேளாண்மை மற்றும் கால்நடை வளர்ப்பையும் ஊக்குவிக்கும் முயற்சியாக இதை பார்க்க முடிந்தது.

சூரிய குண்டம் மற்றும் சந்திர குண்டம்

நாங்கள் பார்த்த இந்த பகுதிகள் அனைத்தும் பொதுவாக அனைவருக்கும் திறந்திருக்கும் இடங்கள் அல்ல.

ஈஷா யோகா மையத்தில் தங்கியிருப்பவர்களுக்கு மட்டுமே சில பகுதிகளை பார்வையிட அனுமதி வழங்கப்படுகிறது.

ஆனால் சாதாரணமாக வருகை தரும் பயணிகள், நுழைவாயிலில் காலணிகளை ஒப்படைத்த பிறகு வளாகத்தின் முக்கிய பகுதிகளுக்கு செல்ல முடியும்.

அந்த வகையில், உள்ளே நுழைந்த பிறகு பெரும்பாலானோர் முதலில் செல்லும் இடம் சூரிய குண்டம் ஆகும்.

ஈஷா யோகா மையத்தின் முக்கிய ஆன்மிக அம்சங்களில் ஒன்றாக கருதப்படும் இந்த இடத்தை நோக்கி நாங்கள் அடுத்ததாக பயணத்தை தொடர்ந்தோம்.

முதலில் பார்க்கக்கூடிய முக்கியமான இடங்களில் ஒன்று சூரிய குண்டம் ஆகும்.

இது ஆண்கள் நீராடுவதற்காக அமைக்கப்பட்டுள்ள ஒரு பிரத்யேக நீர்நிலையாகும்.

அதேபோல் பெண்களுக்காக தனியாக சந்திர குண்டம் என்ற பகுதியும் அமைக்கப்பட்டுள்ளது.

ஈஷா மரபின்படி, மனித உடலில் சூரியன் மற்றும் சந்திரனின் சக்தி தாக்கங்கள் இருப்பதாக கருதப்படுகிறது.

அதில் ஆண்களுக்கு சூரிய சக்தியும், பெண்களுக்கு சந்திர சக்தியும் அதிக தொடர்புடையதாக இருப்பதால் இந்த இரண்டு பகுதிகளும் தனித்தனியாக வடிவமைக்கப்பட்டுள்ளன.

சூரிய குண்டத்தின் உள்ளே ரசலிங்கம் என அழைக்கப்படும் சக்திவாய்ந்த லிங்கமும் பிரதிஷ்டை செய்யப்பட்டிருக்கிறது.

நம் பாரம்பரியத்தில் கோயிலுக்கு செல்வதற்கு முன்பு குளம் அல்லது தீர்த்தத்தில் நீராடுவது ஒரு வழக்கமாக இருந்து வருகிறது.

அதேபோன்று, இங்கும் இந்த நீர்நிலையில் நீராடிவிட்டு தியானலிங்கத்தை தரிசிக்கச் செல்லும் நடைமுறை பின்பற்றப்படுகிறது.

இவ்வாறு நீராடுவது உடல் மற்றும் மனதை அமைதிப்படுத்த உதவும் என்று நம்பப்படுகிறது.

மேலும் தியானலிங்கம் போன்ற சக்தி மிக்க ஆன்மிக இடங்களுக்குள் செல்லும் முன்பு, உடலையும் மனதையும் தயார்படுத்தும் ஒரு அனுபவமாக இது கருதப்படுகிறது.

அதனால் பலரும் சூரிய குண்டம் அல்லது சந்திர குண்டத்தில் நீராடிய பிறகே தியானலிங்கம் நோக்கி தங்களின் பயணத்தை தொடர்கின்றனர்.

நாகத்தின் குறியீடும் சூரிய குண்டத்தின் சிறப்பும்

சூரிய குண்டத்தில் நீராடுவது, அங்கு நிலவுவதாக நம்பப்படும் ஆன்மிக சக்தியை உள்வாங்குவதற்கு உதவியாக இருக்கும் என்று கூறப்படுகிறது.

குறிப்பாக தியானலிங்கம் போன்ற சக்தி மிக்க இடங்களுக்கு செல்லும் முன்பு, உடலையும் மனதையும் தயார் செய்யும் ஒரு அனுபவமாக இது கருதப்படுகிறது.

யோக மரபில், நாகம் என்பது குண்டலினி சக்தியின் அடையாளமாக பார்க்கப்படுகிறது.

மனிதனுக்குள் உறங்கிக் கிடக்கும் அந்த உள் சக்தியை குறிக்கும் சின்னமாக நாகம் பல இடங்களில் பயன்படுத்தப்படுகிறது.

அதனால்தான் சிவபெருமானின் உருவங்களிலும், ஆன்மிக மரபுகளிலும் நாகத்திற்கு முக்கிய இடம் வழங்கப்படுகிறது.

சிவன் உயர்ந்த சக்தி நிலையில் இருப்பதற்கான குறியீடாக, அவருடைய கழுத்தில் நாகம் அலங்கரிக்கப்பட்டிருப்பதை நாம் காண முடிகிறது.

அதேபோல் பல கோயில்களிலும் நாக உருவங்கள் மற்றும் நாகச் சின்னங்கள் காணப்படுகின்றன.

ஆன்மிக மரபுகளின்படி, நாகத்தின் குறியீடு இடம்பெற்றிருக்கும் இடங்கள் சக்தி மிக்க தலங்களாக கருதப்படுகின்றன.

சூரிய குண்டத்தில் நீராடிய பிறகு, அங்குள்ள நாக வடிவ சிற்பத்தையும் தரிசித்துவிட்டு, அடுத்த ஆன்மிக அனுபவத்தை நோக்கி பலர் பயணத்தை தொடர்கின்றனர்.

இவ்வாறு ஒவ்வொரு இடமும் யோக கலாச்சாரம் மற்றும் ஆன்மிக அடையாளங்களுடன் தொடர்புபடுத்தப்பட்டு வடிவமைக்கப்பட்டிருப்பதை ஈஷா யோகா மையத்தில் காண முடிகிறது.

தியானலிங்கம் நோக்கிய பாதையில் இயற்கை அழகு

சூரிய குண்டத்தை பார்வையிட்ட பிறகு, அடுத்த முக்கியமான இடத்தை நோக்கி நாங்கள் நடந்துச் சென்றோம்.

அந்த பாதையில் சென்றுகொண்டிருக்கும்போது சுற்றியிருந்த சூழல் மனதை கவரும் வகையில் அமைந்திருந்தது.

பசுமை நிறைந்த தோட்டங்கள், அழகாக வடிவமைக்கப்பட்ட நடைபாதைகள் மற்றும் அமைதியான சூழல் அந்த இடத்திற்கு தனித்துவமான அழகை வழங்கின.

நடுவில் சிறிய குளம் ஒன்று அமைக்கப்பட்டிருந்தது.

அந்த குளத்தை கடந்து செல்ல ஒரு அழகிய பாலமும் அமைக்கப்பட்டிருந்தது.

அந்த பாலத்தின் மீது நின்று சுற்றியுள்ள சூழலை ரசிக்கும்போது, நகர வாழ்க்கையின் பரபரப்பை மறக்கச் செய்யும் அமைதியான உணர்வு கிடைத்தது.

இயற்கையும் ஆன்மிகமும் ஒன்றிணைந்த அந்த சூழல், அங்கு வரும் ஒவ்வொருவரையும் சில நிமிடங்கள் நின்று ரசிக்கத் தூண்டுகிறது.

தியானலிங்கத்திற்கு முன் இருக்கும் நந்தியின் குறியீடு

தியானலிங்கத்தை அடைவதற்கு முன்பாக நந்தியின் சிலை அமைக்கப்பட்டுள்ளது.

இந்த நந்தி வெறும் சிற்பமாக மட்டுமல்லாமல், சில முக்கியமான வாழ்க்கைத் தத்துவங்களை நினைவூட்டும் அடையாளமாகவும் கருதப்படுகிறது.

ஒரு மனிதன் தனது வாழ்க்கையில் உயர்ந்த நிலையை அடைய வேண்டும் என்றாலும், ஏதாவது முக்கியமான மாற்றம் நிகழ வேண்டும் என்றாலும், அதற்கான பொறுமையும் காத்திருக்கும் மனநிலையும் அவசியம் என்பதைக் குறிக்கும் வகையில் நந்தி அங்கு அமைக்கப்பட்டுள்ளது.

அதேபோல் தியானம் என்பது நாம் செய்கிற ஒரு செயல் மட்டுமல்ல; அது நமக்குள் நிகழ வேண்டிய ஒரு உள்நிலை அனுபவமாகவும் பார்க்கப்படுகிறது.

அந்த அனுபவம் நிகழும் வரை பொறுமையுடன் காத்திருக்க வேண்டும் என்ற கருத்தும் இதில் அடங்கியுள்ளது.

காத்திருப்பும் விழிப்புணர்வும்

நந்தியின் உருவத்தில் மற்றொரு முக்கியமான குறியீடும் உள்ளது.

காத்திருப்பது மட்டுமல்ல, அதே நேரத்தில் முழுமையான விழிப்புணர்வுடனும் இருக்க வேண்டும் என்பதையே அது உணர்த்துகிறது.

பொறுமையாக காத்திருக்கும் போது சோர்வோ அலட்சியமோ இல்லாமல், எப்போதும் விழிப்புடன் இருக்க வேண்டும் என்ற எண்ணத்தை இந்த வடிவமைப்பு பிரதிபலிக்கிறது.

அதனால்தான் நந்தியின் ஒரு கால் தயார்நிலையை குறிக்கும் வகையில் வடிவமைக்கப்பட்டுள்ளதாக விளக்கப்படுகிறது.

ஒரு கோயிலுக்குள் நுழையும் முன்பு, பக்தர்கள் மனதில் இருக்க வேண்டிய இரண்டு முக்கியமான பண்புகள் — பொறுமை மற்றும் விழிப்புணர்வு — என்பதையே நந்தி நினைவூட்டுகிறது.

இந்த எண்ணங்களுடன் தியானலிங்கத்தை நோக்கி நாங்கள் எங்கள் பயணத்தை தொடர்ந்தோம்.

இலவச ருத்ராட்சம் மற்றும் லிங்க பைரவி தரிசனம்

தியானலிங்கம் செல்லும் பாதையில், வருகையாளர்களுக்கு இலவசமாக ருத்ராட்சம் வழங்கப்படும் இடமும் உள்ளது.

விருப்பமுள்ளவர்கள் அந்த ருத்ராட்சத்தை பெற்றுக்கொள்ளலாம்.

அதன்பிறகு அங்குள்ள முக்கியமான ஆன்மிகத் தலங்களில் ஒன்றான லிங்க பைரவி சன்னதியை நோக்கி சென்றோம்.

ஈஷா யோகா மையத்தின் முக்கிய அடையாளங்களில் ஒன்றாக விளங்கும் இந்த சன்னதி, பெண்தன்மை கொண்ட சக்தியை மையமாகக் கொண்டு பிரதிஷ்டை செய்யப்பட்டதாக கூறப்படுகிறது.

அதனால் இந்த ஆலயத்தின் பல பராமரிப்பு பணிகளும் பெண்களால் மேற்கொள்ளப்படும் வகையில் அமைக்கப்பட்டுள்ளன.

குடும்ப வாழ்க்கையுடன் தொடர்புடைய சடங்குகள்

லிங்க பைரவி சன்னதியில் குடும்ப வாழ்க்கையுடன் தொடர்புடைய பல்வேறு சடங்குகள் நடத்தப்படுகின்றன.

குழந்தைகளுக்கு பெயர்சூட்டும் நிகழ்ச்சி, முதல் முடி காணிக்கை, வித்யாரம்பம் போன்ற கல்வி தொடக்க சடங்குகள் மற்றும் திருமணங்கள் போன்ற நிகழ்வுகள் இங்கு நடைபெறுகின்றன.

அதேபோல் மறைந்தவர்களுக்காக செய்யப்படும் சில நினைவு மற்றும் கர்ம சடங்குகளும் இங்கு நடத்தப்படுகின்றன என்று விளக்கமளிக்கப்பட்டது.

குடும்ப வாழ்க்கையில் மனிதர்களுக்கு தேவையான பல்வேறு ஆசைகள், விருப்பங்கள் மற்றும் வாழ்வியல் தேவைகளுடன் தொடர்புடைய பிரார்த்தனைகள் இந்த சன்னதியில் நடைபெறுகின்றன.

கருணை மற்றும் அரவணைப்பின் அடையாளம்

லிங்க பைரவி, கருணையும் அரவணைப்பும் நிறைந்த தெய்வீக சக்தியின் வடிவமாக பக்தர்களால் போற்றப்படுகிறது.

பலர் தங்களின் வாழ்க்கைத் தேவைகள், குடும்ப நலன் மற்றும் மன அமைதிக்காக இங்கு வந்து பிரார்த்தனை செய்கின்றனர்.

பயம், பதற்றம் அல்லது மனக்குழப்பம் போன்ற உணர்வுகளை கடந்து செல்ல மனதிற்கு உறுதியும் நம்பிக்கையும் கிடைக்கட்டும் என்ற எண்ணத்துடன் பலரும் இந்த சன்னதியை தரிசிக்கிறார்கள்.

அவ்வாறு லிங்க பைரவி சன்னதியின் அமைதியான சூழலை அனுபவித்த பிறகு, அடுத்ததாக தியானலிங்கம் நோக்கி எங்கள் பயணம் தொடர்ந்தது.

தியானலிங்கம் – அமைதியும் ஆன்மிகமும் ஒன்றாகும் இடம்

நந்தி சிலைக்கு நேரெதிரே அமைந்துள்ள இடம்தான் ஈஷா யோகா மையத்தின் முக்கிய ஆன்மிக மையமாக விளங்கும் தியானலிங்கம்.

வெளிப்புறத்திலிருந்து பார்க்கும்போது, பிரம்மாண்டமான குவிமாட வடிவில் அமைக்கப்பட்ட தியான மண்டபம் மிகவும் கம்பீரமாக காட்சியளிக்கிறது.

தியான மண்டபத்தின் முன்புறத்தில் ஒரு உயரமான தூண் அமைக்கப்பட்டுள்ளது.

அந்த தூணில் பல்வேறு மதங்களின் அடையாளச் சின்னங்கள் பொறிக்கப்பட்டுள்ளன.

எந்த ஒரு குறிப்பிட்ட மதத்தையும் மையமாகக் கொள்ளாமல், அனைத்து மதங்களுக்கும் சமமான மரியாதை வழங்கும் எண்ணத்தை அது வெளிப்படுத்துகிறது.

தியான மண்டபத்தின் உள்ளே நாத ஆராதனை அனுபவம்

மண்டபத்திற்குள் நுழைந்தவுடன், அதன் நடுப்பகுதியில் சுமார் 13 அடி உயரத்தில் அமைந்துள்ள தியானலிங்கத்தை தரிசிக்க முடிகிறது.

அமைதியான சூழலில் அனைவரும் வட்ட வடிவில் அமர்ந்து தியானம் செய்வதற்கான வசதிகள் ஏற்பாடு செய்யப்பட்டுள்ளன.

மண்டபத்திற்குள் நிலவும் அமைதியே மனதை இயல்பாக அமைதிப்படுத்தும் தன்மையைக் கொண்டதாக உணரப்படுகிறது.

பலரும் அங்கு அமைதியாக அமர்ந்து தியானத்தில் ஈடுபடுவதைக் காண முடிந்தது.

நாங்கள் சென்ற நேரம் மதிய நேரமாக இருந்ததால், தியானத்துடன் சேர்த்து நாத ஆராதனை நிகழ்ச்சியையும் காணும் வாய்ப்பு கிடைத்தது.

இந்த நிகழ்வில் இசை மற்றும் ஒலியின் மூலம் ஒரு தனித்துவமான ஆன்மிக அனுபவம் உருவாக்கப்படுகிறது.

அந்த ஒலியலைகள் தியான மண்டபம் முழுவதும் பரவும்போது, அங்கு நிலவும் சூழல் இன்னும் ஆழமான அமைதியை ஏற்படுத்தியது.

தியானத்துடன் இணைந்து அந்த இசை ஒலிகளை கேட்கும்போது, மனமும் உடலும் ஒருநிலைப்படும் உணர்வு ஏற்படுகிறது.

அமைதி, கவனம் மற்றும் உள்நிலை சமநிலையை உணரச் செய்யும் இந்த அனுபவம், தியானலிங்க தரிசனத்தின் முக்கிய சிறப்புகளில் ஒன்றாக அமைந்தது.

அந்த சூழலில் சில நிமிடங்கள் அமைதியாக அமர்ந்திருந்ததே ஒரு ஆழமான ஆன்மிக அனுபவமாக மனதில் பதிந்தது.

ஆதியோகி சிவன் சிலை நோக்கிய பயணம்

ஈஷா யோகா மையத்தின் முக்கிய பகுதிகளை அனைத்தையும் பார்வையிட்ட பிறகு, அடுத்ததாக ஆதியோகி சிவன் சிலை அமைந்துள்ள இடத்தை நோக்கி பயணத்தை தொடர்ந்தோம்.

யோகா மையத்திலிருந்து ஆதியோகி சிலை வரை நடந்து செல்லும் வசதியும் உள்ளது.

மேலும் பேட்டரி கார் மற்றும் மாட்டுவண்டி போன்ற போக்குவரத்து வசதிகளும் ஏற்பாடு செய்யப்பட்டுள்ளன.

மாட்டுவண்டியில் செல்லும் அனுபவம் மிகவும் வித்தியாசமாகவும், கிராமிய உணர்வை தரக்கூடியதாகவும் இருக்கும்.

நான் ஏற்கனவே ஒரு முறை மாட்டுவண்டியில் இந்த பாதையை கடந்திருக்கிறேன்.

அந்த பயணம் மிகவும் இனிமையான அனுபவமாக இருந்தது.

இந்த முறை நாங்கள் பேட்டரி காரில் பயணம் செய்தோம்.

ஆதியோகி சிலையை சுற்றியுள்ள பரந்த வெளிப்பகுதியை கடந்து செல்லும்போது, தொலைவிலிருந்தே தெரியும் அந்த பிரம்மாண்டமான திருவுருவம் மனதில் ஒரு வியப்பை ஏற்படுத்தியது.

யோகேஸ்வர லிங்கம்

யோக மரபில், ஆதியோகி சிவன் முதல் யோகியாகவும், யோக அறிவை உலகிற்கு வழங்கியவராகவும் போற்றப்படுகிறார்.

அவருக்கு நன்றியையும் மரியாதையையும் வெளிப்படுத்தும் வகையில், இங்கு 112 அடி உயரத்தில் ஆதியோகி சிவனின் திருவுருவச் சிலை நிறுவப்பட்டுள்ளது.

இந்த சிலை உலகம் முழுவதும் இருந்து வரும் பயணிகளின் கவனத்தை ஈர்க்கும் முக்கிய அடையாளமாக விளங்குகிறது.

ஆதியோகி சிலையின் அடிப்பகுதியில் யோகேஸ்வர லிங்கம் அமைந்துள்ளது.

ஆன்மிக மரபுகளில், சக்தியை சேமித்து வைத்திருக்கும் வடிவமாக லிங்கம் கருதப்படுவதால், யோகேஸ்வர லிங்கமும் ஒரு சக்தி வடிவமாக நிறுவப்பட்டுள்ளது என்று விளக்கப்படுகிறது.

ஆதியோகியின் திருவுருவம் மக்களுக்கு உத்வேகம் அளிப்பதற்கும், யோக மரபின் அடையாளமாகவும், சிவபெருமானுக்கு நன்றியை வெளிப்படுத்தும் ஒரு நினைவுச் சின்னமாகவும் இங்கு அமைக்கப்பட்டுள்ளது.

ருத்ராட்சம் மற்றும் ஆன்மிக நினைவுகள்

ஆதியோகி வளாகத்தில் ருத்ராட்ச மணிகளுக்கும் முக்கியத்துவம் அளிக்கப்படுகிறது.

மகா சிவராத்திரி போன்ற சிறப்பு நிகழ்வுகளின் போது, வருகையாளர்களுக்கு ருத்ராட்சம் பிரசாதமாக வழங்கப்படுவதாக கூறப்படுகிறது.

அதேபோல், ஈஷா யோகா மையத்திற்கு வருபவர்கள் இலவசமாக ருத்ராட்சம் பெற்றுக்கொள்ளும் வசதியும் உள்ளது.

தியானலிங்கம் அருகே வழங்கப்படும் இந்த ருத்ராட்சம், பலருக்கும் ஆன்மிக நினைவாகவும், இந்த பயணத்தின் ஒரு சிறிய அடையாளமாகவும் அமைந்து விடுகிறது.

ஆதியோகியின் பிரம்மாண்ட தரிசனம், வெள்ளியங்கிரி மலையின் பின்னணி, அமைதியான சூழல் மற்றும் ஆன்மிக உணர்வு ஆகிய அனைத்தும் சேர்ந்து இந்த பயணத்தை மறக்க முடியாத அனுபவமாக மாற்றுகின்றன.

வெள்ளியங்கிரி மலையின் மடியில் ஆதியோகி தரிசனம்

ஆதியோகி சிலை அமைந்துள்ள பகுதியில் நின்று சுற்றிலும் பார்வையிட்டால், வெள்ளியங்கிரி மலைத்தொடர்கள் முழுமையாக கண்ணில் படும்.

360 டிகிரி கோணத்தில் பார்க்கும்போது, எல்லா திசைகளிலும் மலைகளே சூழ்ந்திருப்பதை உணர முடியும்.

அந்த இயற்கை சூழலின் நடுவே கம்பீரமாக எழுந்து நிற்கும் ஆதியோகி சிலை, இந்த இடத்தின் அழகை மேலும் அதிகரிக்கிறது.

வெள்ளியங்கிரி மலையை அந்த இடத்திலிருந்து ரசிப்பதே ஒரு தனி அனுபவமாக இருக்கும்.

இயற்கையின் அமைதியும், மலையின் பிரம்மாண்டமும், ஆன்மிக சூழலும் ஒன்றாக கலந்த அந்த தருணம் மனதில் நீண்ட நாட்கள் நிலைத்திருக்கும்.

திவ்ய தரிசனம் – ஒளியும் ஒலியும் இணையும் நிகழ்வு

ஆதியோகி வளாகத்தின் மற்றொரு முக்கிய ஈர்ப்பு, தினமும் மாலை நேரத்தில் நடைபெறும் திவ்ய தரிசனம் நிகழ்ச்சியாகும்.

பொதுவாக மாலை 7 மணி அளவில் நடைபெறும் இந்த 3D ஒளி மற்றும் ஒலி நிகழ்ச்சி, ஆதியோகி சிலையை முற்றிலும் வேறொரு தோற்றத்தில் காட்சியளிக்கச் செய்கிறது.

பல வண்ண ஒளிக்கற்றைகள் ஆதியோகி சிலையின் மீது விழும்போது, சிவபெருமானின் திருவுருவம் உயிரோடு இருப்பது போன்ற உணர்வை ஏற்படுத்துகிறது.

ஒளி, இசை மற்றும் ஆன்மிக வரலாறு இணைந்து வழங்கப்படும் இந்த நிகழ்ச்சி, அங்கு வரும் பயணிகள் தவறாமல் பார்க்க வேண்டிய அனுபவங்களில் ஒன்றாகும்.

மாலை நேரத்தில் ஆதியோகி வளாகத்தில் தங்கி இந்த நிகழ்ச்சியை ரசித்தால், அந்த பயணம் இன்னும் நிறைவானதாக மாறும்.

அமைதியை தேடும் அனைவருக்கும் ஒரு சிறந்த இடம்

கோயம்பத்தூரில் அமைந்துள்ள ஈஷா , வெறும் சுற்றுலாத் தலமாக மட்டும் இல்லாமல், இயற்கை, ஆன்மிகம் மற்றும் அமைதியை ஒரே இடத்தில் அனுபவிக்கக்கூடிய தனித்துவமான தலமாக விளங்குகிறது.

வெள்ளியங்கிரி மலையின் பின்னணி, தியானலிங்கத்தின் அமைதி, லிங்க பைரவியின் ஆன்மிக சூழல் மற்றும் ஆதியோகியின் பிரம்மாண்ட தரிசனம் ஆகியவை இந்த இடத்தை சிறப்பான அனுபவமாக மாற்றுகின்றன.

நேரம் கிடைத்தால் வாழ்க்கையில் ஒரு முறையாவது நேரில் வந்து பார்க்க வேண்டிய இடங்களில் ஈஷா யோகா மையமும் நிச்சயமாக இடம்பெறும்.

இங்கு சில மணி நேரங்கள் செலவிட்டால்கூட, மனதிற்கும் உடலுக்கும் ஒரு புத்துணர்ச்சி கிடைப்பதை உணர முடியும்.